Contacto

Na Factoría Cultural d'Avilés pue vese otra esposición. Trátase  de "Eros-Tánatos", de la fotógrafa Sonia Rey, y ta dientro'l programa d'actividaes de conmemoración del décimu aniversariu del CicLaC, Centru d'Interpretación del Cementeriu La Carriona, coincidente cola víspera de la festividá de Tolos Santos. 

Inauguróla pela mañana la conceyala de Cultura y Promoción de Ciudá d'Avilés, Yolanda Alonso, y podrá visitase. de baldre, hasta'l 12 de payares. 

Ye un proyeutu consecuencia d'un cambiu artísticu y personal, plasmáu nuna riestra de más de venti retratos fechos pola autora nos que, col blancu y el negru, asoleya la dualidá "Eros-Tánatos", la vida y la muerte, la pasión y el dolor. 

Los dos institntos tán dientro la dualidá de la vida y la esistencia del ser humanu, lo que va dar un estáu de tensión pa siempre, lo mesmo nel individuu como en tola sociedá n'ensame.

Sonia Rey

Ñació en Gijón/Xixón en 1981. Fotógrafa primero de formación autodidacta y complementada dempués na Universidá Popular de la villa na que ñació, Rey fizo varies esposiciones tanto coleutives como individuales y nesti casu yá se puedo ver na ciudá, col sofitu del Atenéu Obreru de Gijón/Xixón.