La esposición 'La Hestoria d'Avilés' que xunta viñetes y materiales del cómic del mesmu nome que yá lleva tres ediciones, obra del profesor y dibuxante Miguel Solís Santos, saltará del Palaciu de Valdecarzana hasta'l Centru Sociocultural de La Xungarosa/El barrio de La Luz, onde güei pela mañana entamará una primer etapa de lo que va ser un percorríu per dellos barrios de la ciudá.
L'ésitu de la esposición, qu'entamó como una de les actividaes de la "Selmana de les Lletres Asturianes" llevó a que la Estaya de la Llingua de la Conceyalía de Normalización Llingüística, organizó llevar la esposición pel conceyu pa que'l mayor númberu de persones puedan conocer el cómic que se publicó en 1985 y que representa una historia ilustrada en viñetes de la evolución d'Avilés, contada n'asturianu y colos dibuxos de munchos colores del so autor, Miguel Solís Santos, que recibió un homenaxe la selmana pasada con motivu del Día de les Lletres Asturianes.
Asina, 'La Hestoria d'Avilés' tará en La Xungarosa /El barrio de La Luz hasta'l 27 de mayu. Y dende'l 29 de mayu hasta'l 11 de xunu podrá contemplase nel Centru Sociocultural de La Carriona. Amás el material gráficu.
La esposición ofrez los 40 orixinales d'un rellatu conformáu con viñetes dibuxaes en color con tinta china que recueye los principales acontecimientos de la ciudá. La segunda edición foi en 1992 y la tercera en 2009, polo que d'aquella p'acá con tolo que pasó daría pa una cuarta edición.
Miguel Solís Santos ye llicenciáu en Biolóxiques pola Universidá d'Uviéu. Profesor d'Institutu de Bioloxía y Xeoloxía. Autor de 'La Hestoria d´Avilés' (ediciones 1985, 1992 y 2009). Premiáu en 2000 col Fuertes Acevedo pol so ensayu históricu sobre los indianos 'La Memoria de les dos Orielles'.
Miembru correspondiente de l'Academia de la Llingua Asturiana. Escritor bayurosu, ente les sos obres destaca Les Llamuergues Doraes, primer novela moderna escrita n'asturianu (1982). Premiaáu col Xosefa Xovellanos de novela nes convocatories de 1980, 1981, 1984 y 2004. Redactor y ilustrador de varios títulos de lliteratura moza y material pedagóxicu.
Pintor de tendencia cubista y espresionista. Cartelista y dibuxante, autor de planos turísticos de la Conseyería de Turismu y del suplementu ‘Así funciona Asturias’ de La Voz de Asturias (1996, 1997). Articulista y collaborador del periódicu La Nueva España. En 2007 gana'l premiu de periodismu Enriqueta González Rubín.
- Normalización Llingüística