Contacto

Xente ye una esposición de Pablo Casanueva, comisariada por Luisa Fraile, que s'inauguró'l día 28 de xunu na Factoría Cultural. Son 36 retratos enmarcaos dientro'l retratu social, nos que ye más importante buscar lo natural, el retratu ensin adornos, y va poder vese hasta'l 15 de xunetu. 

Producida por Solombra, la esposición fórmenla 18 retratos de 10 x 15 y otros 18 más de 61 x 91 en papel Hanhemuhle. La parte sonora ye de Carlos Maestre.

Nesta amuesa entemécense los retratos con grabaciones visuales y sonores que tuvieron dientro'l procesu pa dar movimientu. Nes primeres esparde'l tiempu y quíta-yos el color, nes segundes dexa que s'amontonen les palabres na memoria del espectador o la espectadora y construyan el pasáu cola alcordanza de la guerra, la represión, el trabayu y la historia. Faise un brinde a la reflexón y al diálogu. 

Un viaxe en motocicleta per Ribadesella/Ribeseya en 2012 inspiró a Pablo Casanueva. Naguaba por amosar la cultura asturiana y esto llevólu a tar tres años diendo a pueblos alloñaos de la globalización y a conocer a la so xente. Esti proyeutu xurde de la so encesidá de retratar a la xente más mayor, recoyendo testimonios y enseñando les sos vides y los sos vexos centenarios. 

La Sala Borrón dientro'l programa Jóvenes Artistas Plásticos esbilló esta instalación en 2020 y pal añu siguiente, incluyéronla na esbilla del Catálogu de proyeutos d'Artes Plástiques y Visuales del Principáu d'Asturies. Asina mesmo, recibió ayudes a la producción artística de la Fundación Municipal de Cultura de Gijón/Xixón

Pablo Casanueva

Los sos primeros pasos artísticos diolos na pintura. Más tarde, metióse nel mundu los retratos pa terminar nel cine. Estudió Comunición Audiovisual na Universidá de Burgos y na Universidá del País Vasco en Bilbao. Diose a conocer en 2013 col estrenu de Bernabé, el so primer llargometraxe y el primeru en llingua asturiana. Con él tuvo presente nel Festival Internacional de Cine de Gijón/Xixón, nel Festival de Cine Europa y nel Festival Intercélticu de Lorient, ente otres munches proyeiciones per Asturies.  

En 2021, la so película 8 filmes sobre la guerra tuvo seleicionada nel Festival Internacional de Cine Documental Punto de Vista de Pamplona, na Muestra d'Artes Plástiques d'Asturies 2021 y nes Ayudes a la Producción Artística de la Fundación Municipal de Cultura de Gijón/Xixón. Tamién destaca'l curtiometraxe musical Mensaxe pa la mocedá del Imperiu basáu na obra del Premiu Nacional de Poesía Moza 2019, Xaime Martínez. 

Otres obres destacaes d'él son: Conserveres (2017), videocreación presente nel festival LAN (Bilbao); Al final de este viaje (2017), curtiometraxe qu'algamó'l Premiu Interrail FICX 55; el documental y web serie El Cobayu (2018); la videocreación Llaberintu (2019) presentada nel FICX o la pieza documental Filme urxente sobre La Plaza (2018).

Forma parte de l'Asociación pa la Recuperación de la Memoria Histórica, del Conseyu Asesor de Política Llingüística d'Asturies. También ye artista residente en LABoral Centru d'Arte con un proyeutu de llargometraxe.