Contacto

La Factoría Cultural d'Avilés, en collaboración cola Federación Española d'Universidaes Populares, ofrez dos cursos nuevos de baldre, dedicaos a facer que les muyeres puedan entrar nel mundu sociollaboral. Trátase de "Visiones del mundu textil" y "L'oficiu de la ilustración". Nos dos casos, ta abiertu'l plazu pa matriculase. 

"Visiones del mundu textil" ponse en marcha al traviés del Proyectu estatal Sara, financiáu pol Institutu de les Muyeres pa motivar y acompañar col emprendimientu'l mundu de la moda.

Sobre too ye pa muyeres mayores de 45 años, que nun tienen trabayu, y sobre too, les que tienen problemes y necesiten sofitu, muyeres migrantes  que vien n'España y que falen poco español, o muyeres xitanes que necesiten garrar autoestima y autoconfirmación.

L'oxetivu sedrá que puedan tener trabayu na industria textil, nun taller onde se trabaye n'ensame pa poder xuntar dellos llabores diferentes (corte y confeición, moda sostenible, grabáu y estampación, diseñu gráficu, teñíu...) faciendo que les participantes puedan ver les coses de forma diferente de cara a conseguir un trabayu, afayando que s'integren non sólo dende'l puntu de vista llaboral, sinón tamién personal y social.

El cursu tendrá 12 places y tien tres fases y 248 hores llectives, del 22 de setiembre hasta'l 23 d'avientu. Les clases fadránse de llunes a vienres, de 9.30 a 13.30 hores.

El plazu pa matriculase va ser hasta'l 20 de setiembre, nel númberu de teléfonu 985 548 617; de forma presencial, na factoría Cultural d'Avilés (Avenida de Portugal, 13) o per corréu electrónicu na direición ssanchezp@aviles.es, dando nome y apellíos, númberu de teléfonu y númberu de documentu nacional d'identidá. Les seleicionaes tendrán d'aportar documentu xustificativu qu'acredite la situación de demandante o meyora.

"L'oficiu de la ilustración" dase dientro'l Programa pal desarrollu d'actividaes d'interés xeneral consideraes d'interés social 0,7 (añu 2021), del Ministeriu de Derechos Sociales y Axenda 2030.

Son 15 places pa muyeres apuntu de que la sociedá les refugue (les que nun tienen trabayu y más de 45 años, que tán en families monomarentales, víctimes de violencia machista, con discapacidá o inmigrantes). El so oxetivu principal ye puxar pola integración social, personal y llaboral, dende una perspeutiva global, enseñando diferentes téuniques gráfiques rellacionaes col mundu de la ilustración conceutual y lliteral. 

Tien dos bloques temáticos, son 80 hores llectives, dividíes en 23 xornaes de trabayu, dende'l 20 de setiembre hasta'l 15 d'avientu, n'horariu de martes a xueves de 10.00 a 13.30 hores. 

La matrícula ta abierta hasta'l 16 de setiembre, nel númberu 985 548 617; de forma presencial, nes instalaciones de la Factoría Cultural d'Avilés (Avenida de Portugal, 13) o per corréu elctrónicu en ssanchesp@aviles.es, dando'l nome y los apellíos, perfil (mayor de 45 años, inmigrante...), númberu de teléfonu y númberu de DNI. en casu de que queden places llibres, almitiránse solicitúes d'otres persones que nun cumplan los requisitos fixaos.