Ayuda
La Factoría Cultural ofrez el cursu "Voces a escena:improvisación teatral". Ye de baldre y pa xente mozo de 16 a 35 años. Dirixíu pola actriz avilesina Natalia Cooper, esperta en téuniques d'improvisación teatral. ye de 40 hores llectives con 20 xornaes de trabayu, ente'l 9 d'ochobre y el 12 d'avientu, los xueves y vienres de 18:00 a 20:00 hores, .
Hai 15 places y pa pidir una, puede facese llamando al teléfonu 985548617 o tamién diendo a la mesma Factoría Cultural (Avda. Portugal, 13).
El taller ta plantegáu pa garrar ferramienta enforma necesaria pa la comunicación oral y non verbal con entrenamientu continuu delantre la cámara d'exercicios d'improvisación escénica, de respiración, xestuales...Exercicios que van averar al alumnáu al mundu la interpretación cinematográfica, de los medios audiovisuales y de la mediación llingüística, lo que va sirivir pa descubrise a una mesma o ún mesmu, les llendes personales y el refugu de posibles bloqueos que condicionen la so manera de rellacionase, esperimentando dende'l xuegu, la improvisación y la risa.
Los conteníos y les actividaes a desarrollar nel cursu son
- Cómo me veo, como me proyeuto
- Téuniques d'espresión oral
- Elementos físicos na comunicación
- Xestualidá y manierismos propios
- Neutralidá delantre la cámara
- Téunica de la mirada y del silenciu
- Análisis de testos. Composición de personaxes
- Interpretación delantre la cámara
Esti cursu enmárcase dientro'l programa 0,7 estatal pa que se faiga na CCAA, de la Federación Española d'Universidaes Populares, concretamente na llinia de "Programes pal desarrollu d'actividaes d'interés xeneral consideraes d'interés social" pa fomentar la participación activa y la formación de la mocedá en procesos de liderazgu, contribuyendo a una sociedá más democrática con valores, solidaria, tolerante, n'igualdá y implicándose en dellos desafíos del sieglu XXI.
- Cultura