Seleicionaron al Cementeriu Municipal de La Carriona pal Concursu de Cementerios d'España qu'organiza Funespaña, per aciu de la revista Adiós Cultural na categoría de "Meyor Monumentu" cola candidatura del monumentu de memoria y reflexón "Llábana del Tiempu".
L'Espaciu de Memoria formáu pol Muru de la Memoria, la "Llábana del tiempu" y dos monolitos valieron pa que'l cementeriu avilesín pasare a la final pol so proyeutu global de recuperación de la memoria histórica. Equí ta viva l'alcordanza de les persones que llucharon pola llibertá y la democracia, víctimes del franquismu.
La Carriona reblagó'l corte de seleición d'esta edición cola candidatura de la "Llábana del Tiempu", obra de Doctor en Belles Artes, Carlos Suárez. L'artista avilesín quiso crear una obra qu'atendiere "a la necesidá de recuperar la memoria, faciendo que xurdan per aciu de la obra artística duldes y pruyimientos, abriéndola al pensamientu y a la investigación, que convide a charrar pa reblagar esa llábana del tiempu que pesa tantísimo na nuestra historia más cercana, qu'entá tovía nun fuimos quien a superar y quiciabes nun seyamos quien a ello enxamás".
El vienres 30, un xuráu formáu por persones espertes va fallar esti premiu pa ún de los siete cementerios colos que compite Avilés: Bilbao, Valencia, Reus (Tarragona), Redondela (Pontevedra) tamién conocíu como Cementeriu d'Eidos, Polop (Alicante) y Villaluenga del Rosario (Cádiz). Esta iniciativa busca reconocer l'interés históricu social, artísticu y patrimonial de los cementerios españoles, asina como pa puxar por esti tipu de turismu.
- Cultura