La Estaya de la Llingua, de la Conceyalía de Normalización Lllinguística, organiza un programa de visites teatralizaes pel Parque Ferrera con motivu de la celebración de la selmana de les lletres asturianes. En concreto, organizáronse cuatro visites pa neños y neñes de Primaria de les escueles d'Avilés: El Quirinal, Juan Ochoa y Enrique Alonso.
Tres visites fadránse los díes 6 y 7 de mayu, en plena celebración de la 'Selmana de Les Lletres', y una cuarta sedrá'l 18 de mayu. Van ser toes pela mañana y n'horariu escolar como actividaes complementaries de la programación.
Como n'otres ediciones, les visites guiaes tarán protagonizaes pola actriz Ana Morán y l'actor Borja Roces, qu'esplicarán al alumnáu la bayura que tien el Parque de Ferrera, lo mesmo de la fauna que de la flora, como de patrimoniu cultural. Créese que van participar 136 neños y neñas ente los tres centros.
Calendariu de visites
- Miércoles, 6 de mayu
C.P. El Quirinal, 4º de Primaria
Hora: 10:30
Hora: 12:00
- Xueves, 7 de mayu
C.P. Juan Ochoa, 5º y 6º de Primaria
Hora: 10:30
- Llunes, 18 de mayu
C.P. Enrique Alonso, 4º de Primaria
Hora: 10:30
Esposición y homenaxe a Miguel Solís Santos
Amás d'estes visites que son pal alumnáu de Primaria, la Conceryalía ta celebrando la 'Selmana de les Lletres" n'Avilés con una esposición nel Palaciu de Valdecarzana, na que se puede contemplar la obra pictórica orixinal del dibuxante y miembru de l'Academia de la Llingua Asturiana, Miguel Solís Santos. Trátase de les páxines con ilustraciones que se tresformaron dempués na obra gráfica 'La Hestoria d'Avilés'. Un cómic n'asturianu nel que se fai un percorríu curtiu pela hestoria d'Avilés, los sos fechos históricos más importantes y los personaxes más nomaos de la Villa, una obra que s'asoleyó en 1985 y dos ediciones más dempués con munchu ésitu. L'amuesa tamién tien una riestra oxetos personales del autor rellacionaos cola obra.
En concreto, el 8 de mayu, que ye la fecha na que se festexa 'El Día de les Lletres Asturianes', a les 12:00 hores nel Salón de Receiciones del Conceyu d'Avilés, Miguel Solís Santos sedrá oxetu d'un actu de homenaxe y reconocimientu cola presencia d'autoridaes y personalidaes del mundu asturianista nel que se va lleer dalgún de los testos del autor. Asina quier facese un reconocimientu a la so trayectoria como profesor y académicu avilesín nel 70º aniversariu de la so nacencia.
- Normalización Llingüística