Ayuda
Los 10KM d'Avilés vuelven tres años dempués, na so octava edición, dempués del parón por culpa la pandemia. Xurdiendo como un referente del calendariu atléticu d'Asturies, el Gran Premiu TSK xuntará a más de mil corredores peles cais de la ciudá, el sábadu 4 de xunu pela tarde, a les 18:00 hores.
El premiu presentólu la conceyala de Deportes d'Avilés, Nuria Delmiro, acompañada de Guzmán Menéndez, prsidente del Club Esportate-Bikila, organizador de la prueba, y representantes de varies entidaes patrocinadores.
Nesta edición, la competición pasa a llamase Memorial García Bolaños, n'alcordanza d'una de les organizadores, Raquel García Bolaños, que tolos años facía un llabor de voluntariáu nesta prueba, llegando dende'l sitiu onde nació, Islles Canaries.
Amás, entama tamién el I Paséu Solidariu, una caminata non competitiva de 3 km, que va dir pel parque Ferrera y les cais del cascu históricu d'Avilés, y fadráse en mediu de les pruebes de categoríes más baxes y l'absoluta.
Ye un eventu abiertu pa tol mundu, col envís de recaudar fondos pa l'Asociación Deporte vs Cáncer Infantil na so llucha escontra esta enfermedá. Va poder xunise a esti paséu nel intre esi mesmu día. Tamién se va poder apuntase na páxina web 321go.es, con una aportación de 3 euros.
La carrera senior saldrá de la cai La Cámara, mientres que la meta tará na plaza España. Na última edición, la de 2019, participaron 528 atletes na prueba absoluta, y ganaron María Suárez García y Moka Bakkali. Nes categoríes más baxes aprticiparon 225 persones.
El plazu p'apuntase a la prueba absoluta yá ta peslláu. Nes categoríes infantiles podrá facese un día enantes de la competición, na tienda Deportes Bikila Avilés, na cai José Cueto 39.
Nesta edición, preparáronse tamién actuaciones de Baile Modernu y música. Animación pa una prueba que siempre tuvo munchu públicu y que va prestar muncho lo mesmo a los y les participantes nes diferentes modalidaes deportives qu'a les persones acompañantes.
Programa VIII 10 KM d'Avilés, Memorial García Bolaños, Gran Premiu TSK
• 16.00 hores. Categoríes infantiles
• 17.00 hores. I Paséu Solidariu Deporte vs Cáncer Infantil
• 18.00 hores. VIII 10 Km d'Avilés Memorial García Bolaños, Gran Premiu TSK
- Deportes