Contacto

Alejandro Ferrer Viña y Laureano López Rivas (Plataforma polos Servicios Públicos de la Comarca d'Avilés) y Ana Solís, conceyala de Memoria Democrática.

Les VII Xornaes de Memoria Democrática d'Avilés, organizaes pola Plataforma polos Servicios Públicos de la Redolada d'Avilés en collaboración cola Conceyalía de Memoria Democrática y la Fundación Juan Muñiz Zapico, centren la so mirada nesta ocasión nos últimos años del franquismu y na etapa de la Transición. Presentóles esti miércoles por Ana Solís, conceyala de Memoria Democrática, acompañada por Laureano López Rivas y Alejandro Ferrer Viña, de la Plataforma polos Servicios Públicos de la Redolada d'Avilés.

Coincidiendo col 50º aniversariu de la muerte del dictador quiersealgamar fechos destacaos d'esa dómina, como'l papel d'una parte de la Ilesia nel procesu hacia la democracia per aciu de la figura de los 'cures obreros', asina como la llegalización de los partíos políticos y los sindicatos de trabayadores. A lo cabero, va analizase la presencia de conteníos sobre Memoria Democrática nos programes d'enseñanza d'anguaño.

Son ocho les actividaes programaes ente los meses d'ochobre y xineru, con cuatro meses redondes, tres esposiciones y la proyeición d'un documental.

La xornada inaugural sedrá mañana xuves 23 con una mesa redonda entitulada "La Ilesia nel tardofranquismu: los cures obreros". Sedrá a partir de les 18:30 h. nel palaciu de Camposagrado, y contará cola participación de cuatro sacerdotes con delles trayectories llaborales y pastorales que tienen en común el so compromisu colos y coles trabayadores, asina como la so visión de la Ilesia y l'Evanxeliu según el Conciliu Vaticanu II. Trátase d'Alejandro Alas Suárez, Jesús Ángel Fernández Fernández, Jesús Manuel Álvarez Álvarez y José María Álvarez Rodríguez. El moderador sedrá Alejandro Ferrer Viña, de la Plataforma polos Servicios Públicos de la Comarca d'Avilés. 

La segunda propuesta sedrá'l 13 de payares, poniendo'l documental "Un home ensin mieu", sobre la figura del Padre Llanos,  y va tar el so direutor, Juan Luis de No. Fadráse nel palaciu de Camposagrado.

Nesti mesmu espaciu habrá dos meses redondes. El 19 de payares  la primera, col títulu de 'Llegalización de los partíos políticos n'España', que contará cola participación de políticos como Francisco de Asís (PCE), Pedro García (PSOE) o Isidro Fernández Rozada (AP), amás d'una representación d'UCD entá por confirmar. El 20 de payares sedrá'l turnu de la mesa entitulada 'Llegalización de los sindicatos n'España', na que van tar sindicalistes como Francisco Javier Suárez (CCOO) o Israel Castro (USO), amás d'una representación d'UXT entá por concretar.

Esi mesmu mes, del 12 al 21 de payares, habrá varies esposiciones al mesmu tiempu, que son: "La Transición Democrática n'Avilés”, producida pol Muséu de la Historia Urbana d'Avilés (MHUA); "La Transición Democrática n'Asturies", producida pola Fundación Juan Muñiz Zapico; y una tercer amuesa con llibros y oxetos d'una coleición particular rellacionaos cola enseñanza nel tardofranquismu y la transición n'Asturies. Toes se van poder visitar nel  pisu d'abaxo del palaciu de Camposagrado.

Les xornaes van llevase hasta'l palaciu de Valdecarzana pal pieslle, cola mesa redonda “La Memoria Democrática nos Programes Docentes de la Enseñanza Secundaria”, que se va celebrar el 22 de xineru de 2026, con ponentes entá por confirmar.

La conceyala de Memoria Democrática, Ana Solís, agradeció-y a la Plataforma polos Servicios Públicos de la Redolada d'Avilés por organizar un añu más estes xornaes, "que valen muncho pa que se conozan y espardan los episodios de la nuestra historia más cercana sna qu'hai que camentar". Solís convida a la población a dir a estes xornaes pa "entender meyor el nuestru presente, dende una mirada crítica, y aspirar a un futuru d'avances en derechos y non de retrocesos, polos que nagüen dalgunes fuerces reaicionaries".

Programa

23 d'ochobre

• 18:30 h.: Mesa redonda: “La Ilesia nel Tardofranquismu: Los Cures Obreros”. Palaciu de Camposagrado. Participen los sacerdotes Alejandro Alas Suárez, Jesús Ángel Fernández Fernández, Jesús Manuel Álvarez Álvarez y José María Álvarez Rodríguez. Modera: Alejandro Ferrer Viña, de la Plataforma polos Servicios Públicos de la Comarca d'Avilés. Va tar la conceyala de Memoria Democrática, Ana Solís.

13 de payares

• 19:00 h.: Proyeición del Documental, sobre'l Padre Llanos: "Un home ensin mieu" con asistencia del so direutor, Juan Luis de No. Palaciu de Camposagrado

19 de payares

• 19:00 h.: Mesa redonda: “Llegalización de los Partíos Políticos n'España". Con Francisco de Asís (PCE), Pedro García (PSOE) y Isidro Fernández Rozada (AP), amás d'una representación d'UCD entá por confirmar. Palaciu de Camposagrado.

20 de payares

• 19:00 h.: Mesa redonda: “Llegalización de los Sindicatos n'España”. Francisco Javier Suárez (CCOO) y Israel Castro (USO), amás d'una representación d'UXT entá por concretar. Palaciu de Camposagrado

12 a 21 de payares

• Esposiciones: “La Transición Democrática n'Avilés”, "La Transición Democrática n'Asturies” y amuesa de llibros y oxetos d'una coleición particular rellacionaos cola enseñanza nel tardofranquismu y la transición n'Asturies.  Tarán espuestes al mesmu tiempu les tres nes sales d'esposiciones na planta baxa del Palalciu de Camposagrado.

22 de xineru de 2026

• 19:00 h.: Mesa redonda: “La Memoria Democrática nos Programes Docentes de la Enseñanza Secundaria”. Ponentesentá por confirmar. Palaciu de Valdecarzana