Contacto

El Palaciu de Valdecarzana abre al públicu güei otra esposición, "Indispensables", un percorríu peles pintures y ilustraciones de l'artista gráfica asturiana Mónica Jiménez Art, que se va poder visitar de baldre hasta'l llunes 26 de setiembre.

En "Indispensables" la creadora fai un repasu de la so trayectoria, una obra qu'amuesa perfeutamente'l so activismu y forma de ser reivindicativa. En pallabres de l'autora, ye "reflexu de deseos y esmoliciones, buelga de dolores , ye denuncia de les inxusticies, memoria feminista, solidaridá ente pueblos, anticolonialismu, ye alendar nos momentos malos pa poder volver a respirar". 

Nestos trabayos fai un homenaxe a les muyeres que lluchen polos sos derechos coleutivos, con un mensaxe claru: "volver a ver lo invisible", o lo que ye lo mesmo, amosar  "la responsabilidá polo que ta pasando y querer cambialo", como diz ella mesma: "Pa min ye más fácil gritar dende'l llenzu. Intentar cambiar l'ideariu coleutivu y reivindicar lo negao. Magar que tamién garro pancarta y megáfonu, el pincel y el llápiz vienen dempués de siguío, formando cada ferramienta parte d'un too. 

El públicu va poder ver retratos de muyeres de tol planeta, que s'atrevieron a dar un gritu de llibertá y de rebelase n'ámbitos diferentes, como Virginia Wolf, Úrsula K Leguin, Gloria Fuertes, Nina Simone o Wangari Maathai. 

L'horariu de visita na sala d'esposiciones de Valdecarzana sedrá de llunes a vienres de 11.00 a 14.00 y de 18.00 a 21.00 hores.