Reinaré ye un proyeutu teatral escritu pola sicóloga Natalia Suárez Ríos en 2019 que, gracies a la beca artística que diera esti añu la Factoría Cultural, va asoleyase dientro unos meses. Esti vienres a les 16:30 hores na sala verde d'El Patiu de la Mocedá d'Avilés habrá un aconceyamientu informativu tres del que se van escoyer a les rapaces a les que-yos preste participar como actrices.
Búsquense moces d'ente 16 y 21 años que quieran tar na producción y que tengan estos perfiles: interpretación, carauterización, escenografía, publicidá, cartelería y RRSS, audiovisuales, presentación y organización d'eventos.
El testu nel que se sofita la obra xurde de les charres y propuestes, qu'un grupu de rapazos y rapaces de l'Asociación La Bocarte Cultural tuviere hai tres años con Natalia Suárez, direutora nesi momentu de la Compañía Moza d'esta Asociación. .
La obra ta protagonizada por cinco muyeres y quier mandar un mensaxe de solidaridá coles muyeres y d'amistá al traviés de varios problemes que van xurdiendo, según apaecen les rellaciones de pareya, diversidá sexual, viaxes, deporte y televisión, ente otres coses.
Con un testu dinámicu y falando ente collacies, ideal p'averase al públicu mozu, faise una crítica al amor románticu, pa intentar algamar la propia identidá y l'autoconocimientu.
Nos 6 meses darréu, va ensayase y representase la obra na Factoría Cultural. Tamién se va usar la sala verde de Patiu Avilés pa facer la escenografía y los preseos que se necesiten.
Esti proyeutu quier averase a la mocedá con dellos oficios y xeres propies del teatru pa que despierten interés y curiosidá; tamién pa que xurdan ente la mocedá, espectadores nuevos y nueves que conozan meyor el llinguax escénicu, amás de pa puxar y meyorar, col teatru, la intelixencia emopcional y la salú mental.
La obra va ayudar a asoleyar dellos logros profesionales, deportivos y artísticos de les muyeres, reflexonando sobre cómo afecten los vezos d'una sociedá patriarcal y echando un gabitu , pa que la convivencia seya más xusta y igualitaria ente tol mundu. .
En cuantes que Reinaré se represente, podrán facese actividaes complementaries como foros, alcuentros o meses redondes onde la mocedá pueda aldericar sobre los distintos temes de la obra.
- Cultura