Contacto

Diego Bajo, Héctor Herrero y Yolanda Alonso

El festival Monoloco, consideráu ún de los eventos musicales más populares ente'l públicu mozu, llega por primera vez a Asturies, en concretu  a Avilés. La cita sedrá'l prósimu 30 d'abril de 2025 nel Pabellón de La Madalena d'Avilés.

Un festival que ta medrando dende 2022 y que presentó güei pela mañana  Yolanda Alonso, conceyala de Cultura d'Avilés, acompañada polos CEOS y fundadores del mesmu, Héctor Herrero y Diego Bajo. Destacó la edil que "cola llegada d'esti  festival nuevu refuérzase la capacidá d'Avilés pa convocar y organizar espectáculos multitudinarios, nun recintu que ta siendo una referencia musical nel Norte".

Y añadió: "Reforzamos el compromisu de la conceyalía de Cultura d'ofrecer propuestes de cultura y ociu pa tolos  públicos, nesti casu, destacando especialmente el públicu más mozu, y en feches que permiten desestacionalizar los grandes eventos, que son un puntu d'atracción pa visitantes de toa Asturies y de fuera de la comunidá".

Ñació en 2022

Monoloco ñació en Lleón n'abril de 2022, impulsáu por un grupu de rapazos universitarios pa ufrir una alternativa a les fiestes tradicionales de los campus. Dende la so  primer edición, con 4.000 asistentes, el festival espoxigó enforma, algamando cifres d'hasta 25.000 persones nes sos últimes ediciones na ciudá lleonesa.

L'ésitu de Monoloco fizo que s'espardiere a otres ciudaes, como Valladolid, onde en 2023 xuntó a más de 10.000 asistentes. Esi mesmu añu, tuvo'l reconocimientu de “Meyor Festival d'España según el Públicu” nos Premios Fest, afitándose como un referente dientro'l panorama nacional.

Cartel a ciegues y sorpreses garantizaes

Siguiendo el so  formatu trasdicional, la edición de Monoloco Asturies preséntase con un cartel a ciegues, xurdiendo asina munchu pruyimientu ente los y les siguidores. Amás, el festival organizará un gran sortéu d'entraes nes sos redes sociales (@soyelmonoloco), onde se van dir asoleyando los y les artistes y les sorpreses de manera enteractiva.

Les entraes entamarán a vendese'l  prósimu llunes 24 de febreru.