Contacto

Terminóse nel sieglu XVII y daquella p'acá convirtióse nel palaciu más destacáu d'Avilés. Dalgunes persones espertes señalen la so fachada sur como'l meyor exemplu del barrocu asturianu.

Tien dos fachaes mui diferentes: la norte, que ta na cai La Muralla y la sur na plaza de Camposagrado que ye mui vistosa y elegante dende'l puntu de vista arquiteutónicu. La fachada norte va paralela a la antigua muralla y tien dos pisos. Nel primer pisu hai una galería d'arcos preciosa que sirvía como elementu de vixilancia de tolo que pudiere venir pela mar en plan amenazante (naquel tiempu de pirates que buscaben un botín). El conxuntu fai alcordanza de l'arquiteutura renacentista.

El segundu pisu tien unos balcones que van al empar de los arcos y les abertures qu'hai embaxo, adintelaos y con escudos a los dos llaos que maten les aristes de les esquines. 

La parte sur, diseñada,  paez ser, polos hermanos Menéndez Camina, arquiteutos avilesinos, ye una construcción espectacular. Tien dos torres a los llaos simétriques, les dos con blasones y un cuerpu central rectangular, onde destaca l'escudu monumental de la persona que vivía ellí, Bernaldo de Quirós, marqués de Camposagrado.

Garrando como referencia l'escudu, pueden apreciase nos balcones centrales, diferentes columnes que van cambiando d'estilu al tiempu que se va baxando pal pisu d'abaxo. Con too esto paez que tamos delantre un retablu, lo que constitui otru elementu especial del palaciu. Tamién hai de destacar abondos elementos decorativos d'esta fachada. 

En 1809, na Guerra d'Independencia, los franceses, cola oposición armada de la xente de la Villa, punxeron equí'l so cuartel xeneral.