Contacto

Esti edificiu elegante, del sieglu XVII, ye'l resultáu d'un proyeutu más d'ún de los arquiteutos  avilesinos meyores, Menéndez Camino, que fizo dempués del de la Casa Conceyu. Ye importante ver la rellación armónica qu'hai ente les fachaes de los dos edificios. Rodrigo García Pumarino foi un indianu qu'amasó una fortuna considerable en Perú. En volviendo a la so tierra entama a facer la so casa, al principiu de la cai Rivero y encarga'l proyeutu al arquiteutu avilesín F. Menéndez Camina (fíu). 

Magar que la so fachada (lo único que se conserva agora) tien más adornos, sigue l'esquema de la Casa Conceyu, que d'aquella yá tenía trenta años. Y, por supuesto, incorpora'l soportal: con siete arcos que dan pa la calle y una ventana encima de caún d'ellos, y pelos llaos hai un balcón nel pisu d'enriba. La parte de dientro ye mui grande, hai una fachada estrecha y tenía capiya y munchos cuartos ente los que destaca un salón enorme. 

Dempués d'un tiempu la casa compróla una familia noble, los Llano Ponte, pa vivir nella, pa lo que ficieron reformes na parte que da pa la calle. Hasta hai poco, tuvo unes sales de cine que se llamaben "Marta y María", porque l'escritor asturianu Palacio Valdés vivió enfrente l'edificiu munchos años y según se diz inspiróse nesta casa estupenda pa escribir la novela que se titula asina, Marta y María.   

Armando Palacio Valdés, anque  nun nació na ciudá,  vino de mui pequeñu y vivió equí tamién de mozu nesta cai. Una de les sos obres, La novela de un novelista, cuenta les sos aventures de cuando yera neñu y andaba per Rivero y otres zones avilesines.