Ayuda
El Conceyu d'Avilés acoyó esti martes la presentación y abrióse'l plazu p'apuntase al concursu Espacios Sostenibles, iniciativa organizada pol cluster ECCO pa puxar pol pensamientu críticu sobre los espacios nos que se vive. Cuenta col patrociniu de Caxa Rural d'Asturies y cola collaboración del Conceyu d'Avilés, la Conseyería d'Innovación y Ciencia, Colexos Profesionales (arquiteutos, arquiteutes, inxenieros, inxenieres y apareyadores), COGERSA y CAC.
El concursu ta abiertu pa que participe alumnáu de los centros educativos públicos, concertaos y privaos de toa Asturies, de les etapes de Primaria, Secundaria y Bachilleratu y Formación Profesional de grau Básicu y Mediu. Habrá tres premios en caúna d'estes categoríes.
El plazu p'apuntase abriráse esti miércoles 12 d'ochobre y pieslla'l 30 de payares. La información completa sobre la convocatoria ta na web www.espaciosostenibles.eu.
Na fase final del concursu fadráse una esposición pública de los trabayos como propuesta a una ciudá pensada pa ser sostenible. El cumal va ser una gala final el día 11 de mayu, na qu'habrá una defensa oral de los meyores proyeutos por categoríes.
Espacios Sostenibles busca promover la participación de les persones más moces de toda Asturies nel diseñu de la ciudá y de los espacios onde van vivir les nueves xeneraciones, involucrando a los centros educativos na estratexa de ciudá 2030. Busca'l cumplimientu de los Oxetivos de Desarrollu Sostenible (ODS), ensin escaecer aspeutos tan importantes como la formación, el deprendimientu y la cultura científica y innovadora.
Los equipos que se presenten deberán pensar nun edficiu, esplicar el so funcionamientu a través con una memoria y ponelo en práutica con una maqueta que se va esponer al públicu.
Va pidise a los y les participantes trabayar n'equipu cola coordinación del so profesoráu pa crear un espaciu (edificiu) con un usu concretu y pensndo soluciones pa facelo más sostenible (autoconsumu, meyora del aire, accesibilidá, movilidá sostenible, dixitalización, xestión de los residuos, aprovechamientu d'espacios verdes, etc.). Primero, el profesoráu va poder recibir formación específica nestos temes.
- Educación