Contacto

Cartel del taller para trabayar les emociones

El Serviciu de Mocedá del Conceyu d'Avilés entama un taller d'oratoria y emociones que ye de baldre pa la mocedá d'ente 16 y 25 años. Va facese pela mañana los sábados de los meses de payares y avientu. Les persones interesaes tendrán d'apuntase mandando un corréu a elisabetmartinteatro@gmail.com. El plazu ye hasta'l vienres 4 de payares. 

El taller va dase nel edificiu La Noria dientro'l parque Ferrera onde se va esperimentar coles capacidaes espresives del cuerpu y la voz. Rapazos y rapaces van pasalo bien mientres deprenden a identificar y espresar les sos emociones con xuegos d'espresión corporal, voz, xestos y mímica. 

Va trabayase'l mieu escénicu pa deprender a enfrentase a delles audiencies con muncha calma, la naturalidá y la credibilidá nel discursu pa que seyan quien a coneutar col públicu. Tamién van deprender a estructurar lo que quieren espresar d'una forma clara lo mesmo col mensaxe que quieren tresmitir como los que pueden recibir. L'actividá va guiala Elisabet Martín Teatro. Ye una empresa d'Avilés que se dedica a les artes escéniques, creada en 2015 por Elisabet Martín Riaño, actriz titulada n'Interpretación Testual pol ITAE en 2003. 

Esta actividá ta dientro'l programa d'actividaes que se desenvuelven nel Espaciu BEPA d'atención al bienestar emocional, prevención y autocuidáu. Onde tamién hai otres actividaes sociales o d'ociu pa la mocedá d'Avilés en materia d'atención a les sos emociones, una cuestión cimera p'afitar el so espoxigue integral ensin riesgu nengún pa la salú física, síquica y social.