Contacto

En xunetu, la UCAYC entamó la campaña Veranu/Bonitu, de promoción de Bonitu del Norte en chigres, sidreríes y restaurantes de la contorna d'Avilés, que tienen a esti pexe dientro'l so menú. Dientro d'esto mesmo, entamen un concursu de recetes feches con esti pescáu; rei de la Rula avilesina pel branu. 

Una propuesta de la Unión de Comerciantes d'Avilés y Comarca, en collaboración col Conceyu d'Avilés, la Mancomunidá Comarca d'Avilés, La Plaza-El Mercáu d'Avilés y la Rula d'Avilés, pa encumar esti productu que tien el sellu de calidá que-y da la marca Alimentos del Paraísu, del Gobiernu d'Asturies. .

Esti concursu, al que se puede presentar cualquier persona que viva n'España mayor de 18 años, valdrá dende'l 16 hasta'l 31 d'agostu y va dar 400 euros en cheques regalu pa mercar nes pescaderíes de La Plaza-El Mercáu d'Avilés: 200 euros a la meyor receta, 125 a la segunda y 75 a la tercera. 

Pa participar hai de rellenar el formulariu que se puede atopar dientro la páxina web de la UCAYC, na direición http://ucayc.es/concursu-recetes-bonitu.Nel mesmu hai de poner los datos personales (nome y direición de corréu electrónicu), tamién el nome de la receta y la so preparación. Tamién habrá d'amestar un vidiu, o un retratu, de la receta fecha. 

El concursu fallaráse coincidiendo cola Selmana de la Tapa, del 5 al 11 de setiembre, nuna fecha que se va anunciar pa esta ocasión, na qu'un xuráu conformáu por persones espertes en gastronomía y profesionales de la hostelería, decidirá cuáles son les tres recetes ganadores.

Campaña Veranu/Bonitu

La campaña Veranu/Bonitu ta dientro d'Avilés, Sabor de veranu, que Conceyu, Mancomunidá Turismu Comarca Avilés, UCAYC, Rula d'Avilés y La Plaza, llanzaron en xuntu celebrando, con diferentes eventos, cómo la bona xinta conforma ún de los sellos d'identidá y de atracción turística de la contorna, tamién pel branu.

Veranu/Bonitu céntrase nun productu de calidá, pescáu de forma artesanal y sostenible y xuníu dafechu a la imaxen d'Avilés y a la de La Rula: el bonitu del norte. Esta promoción  llegará tamién a agostu a chigres, sidreríes y restaurantes que se xunieren a esta campaña, lo mesmo que tean dientro la UCAYC como non.

Los restaurantes participantes tienen un cartel col sellu La Rula y Alimentos del Paraísu, nel que ta puesta la receta o recetes coles que participen nuna campaña que se ta espardiento tamién a través peles redes sociales y en plataformes web.