La Estaya de la Llingua de Avilés dedica a la ciencia y al conocimientu la so nueva programación nos centros culturales de los barrios, nel  trimestre que vien, de marzu a mayu. Baxo l'epígrafe "Viaxe al conocimientu: Esplora, Crea y Deprende", les neñes y los neños, al tiempu qu'usen y sienten la llingua asturiana  van conociendo la vida de muyeres inspiradores asturianes, la física del vuelu o tamién deprenden a preparar dalguna qu'otra llambionada. En collaboración con Aladanza, Educación y Tradición.

"Asturianes: venti muyeres y coleutivos inspiradores", d'Alicia Álvarez

La primer actividá sedrá en marzu, trabayando'l llibru "Asturianes: venti muyeres y colectivos inspiradores", d'Alicia Álvarez. Neñes y neños prepararán un diorama de plastilina col que se van calar na vida de pintores, escritores y deportistes asturianes.

• 7 de marzu. Centru Cultural de La Carriona
• 14 de marzu. Biblioteca de La Xungarosa / El barrio de La Luz
• 21 de marzu. Centru Cultural de Los Canapés

"De qué tará fecha la lluna", de Miguel Rojo y Borja Saura

El cuentu "De qué tará fecha la lluna", de Miguel Rojo y Borja Saura, sedrá'l puntu de partida pa deprender aspeutos práuticos sobre la física del vuelu. Amás, disfrutarán construyendo aparatos voladores tremendos. En marzu y abril.

• 28 de marzu. Centru Cultural de La Carriona
• 4 d'abril. Biblioteca de La Xungarosa / El barrio de La Luz
• 11 d'abril. Centru Cultural de Los Canapés

"La Curuxa Catuxa", d'Inaciu Galán y Vero Suari

La última actividá protagonizarála "La Curuxa Catuxa", creada por Inaciu Galán y Vero Suari. Con ella, neñes y neños van averase a la cocina para da-y forma a postres y otres llambiotaes asturianes mui riques. En mayu.

• 9 de mayu. Biblioteca de La Xungarosa / El barrio de La Luz
• 16 de mayu. Centru Cultural de Los Canapés
• 23 de mayu. Centru Cultural de La Carriona

Tolos talleres son de baldre, pa edaes d'ente 4 y 8 años, y con 15 places caún. Entamen a les 18.00 hores, y pa participar, hai d'apuntase primero. Pue ser per Whatsapp nel númberu 634 821 613, na biblioteca de cada centru o per corréu electrónicu na direición estayallingua@aviles.es.