Contacto

Un grupu de cuatro persones moces y una trabayadora na estaya de la mocedá de Saint-Nazaire -ciudá francesa hermanada con Avilés- va visitar nos díes 5 y 6 de xunetu pa conocer de cerca los programes del Serviciu de la Mocedá del Conceyu d'Avilés. 

El grupu francés va tar dientro'l Conseyu de la Mocedá de Saint-Nazaire y recibió una beca pa dir a diferentes ciudaes europees pa conocer cómo funcionen les sos polítiques pa la mocedá.  

Nos meses anteriores a la visita, responsables de los dos conceyos aconceyáronse pa concretar la visita y organizar un alcuentru cola mocedá d'Avilés que participa nos diferentes proyeutos del Serviciu de la Mocedá. 

Asina, mozos y moces de los proyeutos "Antenas Informativas", "Bosque Comestible", "Conecta Joven", "Conseyu d'Infancia y Adolescencia", "Hoy se sale", "Radiadora" y "Transit" cola coordinación de la Oficina de Movilidá Xuvenil Internacional "Europa Aquí", preparó varies actividaes pa que'l grupu francés conoza los diferentes proyeutos, asina como la ciudá. 

L'axenda prevista pa los díes 5 y 6 de xunetu inclui un aconceyamientu cola conceyala de Mocedá, Raquel Ruíz, nel Salón de Receiciones del Conceyu (día 5 a les 12 hores), una comida intercultural, una visita guaida pela ciudá dende la visión de la xente mozo, una presentación interactiva de los diferentes proyeutos, una visita al llocal de "Hoy se sale", una merienda nel Bosque Comestible y una escursión a la playa. 

L'axenda tamién inclui un acocneyamientu ente la responsable del grupu francés y la coordinadora d'Europa Aquí pa organizar actividaes internacionales nel marcu del programa européu "Erasmus Plus".