![](/documents/20124/564214/REN%C3%89.+MHUA_resized.jpg/45574488-9b63-1524-d5cb-6b95e0087198?t=1624383088550)
MHUA
Nel centru del cascu históricu avilesín, atopamos el Muséu de la Historia Urbana d'Avilés, nel sitiu onde hai mil años xurdió la primer villa cantábrica na cai La Ferrería, frente a San Nicolás de Bari que munchos sieglos foi la primer ilesia parroquial de la villa y anguaño ye templu conventual de los Padres Franciscanos y tamién enfrente del Centru Cultural Internacional Oscar Niemeyer, últimu monumentu de la llarga historia d'Avilés.
El MHUA plantéga-y a quien lu visita un discursu históricu que resume la historia d'Avilés, un pasáu ricu que se xune al presente per un ventanal dende'l que se puede ver la única obra creada n'España pol gran arquitectu Oscar Niemeyer. Nel segundu pisu, siguiendo col percorríu, puede atopase la bayura d'una villa medieval con un fueru que-y concediere Alfonso VI en 1085 y confirmáu pol so nietu, Alfonso VII, setenta años dempués y que xeneró una actividá urbana intensa y comercial, convirtiendo al puertu avilesín nel puertu d'Uviéu y Lleón.
El contenidu d'esti espaciu complétenlu los palacios imponentes del Avilés modernu y los personaxes ilustres con nome propiu como Pedro Menéndez, Juan Carreño de Miranda, Menéndez Camina...
El percorríu termina na primer planta onde se ve la bayura qu'había n'Avilés a lo cabero'l sieglu XIX colos viaxes d'ida y vuelta pa Cuba, apaeciendo asina la figura del indianu, primeros mecenes de la villa. Yá nel sieglu XX, ENSIDESA, revolucionó non sólo Avilés sinón tamién Asturies. La coleición diplomática tan rica del Conceyu d'Avilés, la vida social, el trabayu, la vivienda, les primeres actividaes industriales como la cerámica y la calderería de Miranda, la emigración pa Cuba, el mundu cultural avilesín o la llegada d'aquellos emigrantes que veníen d'otros sitios d'España pa llevnatar y trabayar n'ENSIDESA, van conformando un discursu a lo llargo los capítulos La villa medieval, La villa moderna, La ciudá burguesa, La ciudá industrial, nos que se se va distribuyendo'l Muséu de la Historia Urbana d'Avilés.
Un muséu que tien elementos modernos interactivos pa que quien lu visite pueda afondar nel conocimientu d'esti pasáu tan bayurosu; elementos colos que se pretende que les persones llariegues o les foriates descubran y que-yos preste Avilés, una villa con una estructura urbana y un patrimoniu arquitectónicu y monumental qu'en sí mesma yá ye un muséu.
Preciu: Entrada de baldre
Horariu:
Martes a vienres: 10:30 a 13:30h / 16:00 a 20:00h
Sábados: 11:00 a 13:30h / 16:00 a 20:00h
Domingos y festivos: 11:00 a 13:30h
Llunes pesllao
Contautu:
Teléfonu: 985 565 512
Corréu Electrónicu: museodeaviles@ayto-aviles.es
Redes Sociales
https://www.facebook.com/Museo-de-Historia-Urbana-de-Avilés
Señes:
Muséu de la Historia Urbana d'Avilés
Cai La Ferrería, 35
33402 Avilés
-
Fiestas y Festejos
-
Igualdad
-
Fiestas y Festejos
-
Fiestas y Festejos