El martes 16 d'agostu, col pasacais "Vertumno, sieglu d'oru y rises", de les compañíes estremeñes Atakama, Vistequienteviste y Atutiplan, y l'estrenu absolutu de "Maritornes", d'Arte Producciones, va dar empiezu la segunda edición del Festival de Teatru Clásicu d'Avilés Bances Candamo, que crez hasta los cinco díes y les seis representaciones, y va cerrar esti domingu, 21 d'agostu, el monólogu "Naufraxos".
Entamáu pol Conceyu d'Avilés, toma nome del autor nacíu n'Avilés en 1662, Francisco Bances Candamo, escritor de cámara de la corte de Carlos II. Nesta edición con dos escenarios nel cascu históricu de la ciudá, la ilesia de San Nicolás de Bari y la plaza de Camposagrdo, y entrada llibre hasta completar l'aforu.
Presentáronlu Yolanda Alonso, conceyala de Cultura y Promoción de Ciudá y José Rico, direutor d'Arte Producciones, y impulsor del certame.
Asina, el públicu d'Avilés va tener ocasión d'esfrutar de la primer producción propia del festival, "Mazías. La poesía mata", de Bances Candamo, dirixida por Ángel González y estrenada'l pasáu mes de xunu n'Almagro, con un repartu coral de 12 intérpretes, na so mayoría d'Avilés y d'otros sitios d'Asturies, encabezáu por Zorion Eguileor y Nuria Gallardo.
Cuatro compañíes xuniéronse pa da-y vida, les asturianes Arte Producciones y EPO Producciones, la estremeña Atakama, y la madrilana Gesteatral, y la so representación va tener llugar el sábadu 20, na plaza de Camposagrado, a les 22.00 hores.
Les compañíes asturianes destaquen especialmente nesta segunda edición. Asina, Arte Producciones tamién ufiertó ayer l'estrenu absolutu de "Maritornes", un homenaxe a Cervantes interpretáu por Ana Blanco y Patricia Martínez.
Y el miércoles 17, llega la vez d'una de les compañíes de mayor prestixu de la comunidá, Teatru del Norte, y el so monólogu del "Lazarillo de Tormes", interpretáu por David González. Sedrá a les 20.30 hores nel claustru San Nicolás de Bari.
Tamién con sellu d'Asturies tará'l montaxe pal pieslle, l'estrenu absolutu de "Naufragios", basáu na obra d'Álvar Núñez Cabeza de Vaca y el so percorríu pioneru pelo que güei ye Estaos Xuníos. Tráela la compañía Alquimia Teatru, y ye un monólogu interpretáu por Ángel Cuesta, el domingu 21, a les 20.30 hores nel claustru de San Nicolás de Bari.
Pa terminar, otru de los grandes montaxes qu'ufierta'l festival, con siete intérpretes n'escena, va ser el clásicu de Tirso de Molina "Marta la piadosa", al cargu de la prestixosa compañía madrilana Teatru Defondo, en versión y direición escénica de Vanessa Martínez. Sedrá'l vienres 19, a les 22.00 hores, nel escenariu de la plaza de Camposagrado.
Programa II Festival de Teatru Clásicu Bances Candamo
Martes 16 d'agostu
19.00 hores. Pasacais "Vertumno, siglo de oro y risas", d'ATAKAMA Creatividad Cultural, Vistequienteviste y Compañía Atutiplan (Extremadura). Cais del cascu históricu. Percorríu: plaza d'Álvarez Acebal, cai San Francisco, plaza España, cai La Fruta, plaza de Camposagrado, plaza de Carlos Lobo, calle La Ferrería, plaza España, cai San Francisco y plaza d'Álvarez Acebal.
20.30 hores. "Maritornes y Aldonza". Arte Producciones JR teatru (Asturies). Claustru Ilesia de San Nicolás.
Miércoles 17 d'agostu
20.30 hores. "Lazarillo de Tormes", de Teatru del Norte (Asturies). Claustru Ilesia de San Nicolás.
Vienres 19 d'agostu
22.00 hores. "Marta la piadosa", de Tirso de Molina. Teatru Defondo (Madrid). Plaza de Camposagrado.
Sábadu 20 d'agostu
22.00 hores. "Mazías. La poesía mata. (El español más amante y desgraciado Mazías)". De Francisco Bances Candamo, versión d'Ángel García Suárez. Arte Producciones JR Teatro, EPO Producciones (Asturies) Atakama (Extremadura) y Gesteatral (Madrid). Plaza de Camposagrado
Domingu 21 d'agostu
20.30 hores. "Naufragios". D'Álvar Núñez Cabeza de Vaca. Alquimia Teatro (Asturies). Claustru Ilesia de San Nicolás.
- Cultura