Contacto

Avilés Acción Film Festival presenta'l cartel de la so ventiún edición, que va ser dende'l 8 hasta'l 15 d'ochobre en sedes diferentes de la ciudá. Otra vegada más vuelve a batise'l récord de participación, con 748 obres apuntaes, y un total de 24 curtiometraxes finalistes que van competir na Seición Oficial, Seición Asturies y Seición Mediuambiente.

Avilés Acción ta organizáu pola Conceyalía de Cultura del Conceyu d'Avilés col sofitu d'Asturiana de Zinc (Glencore) y la collaboración del Conseyu de la Mocedá d'Asturies, Puertu d'Avilés, Unión de Comerciantes d'Avilés y Comarca (UCAYC) y la Radiotelevisión d'Asturies (RTPA).

El certamen va repartir 6.000 euros en premios y ye la primer vez, Avilés Acción sedrá un Festival calificador pa los Premios Goya 2023, un aliciente más pa los 10 trabayos que compiten na Seición Oficial. Sólo son 41 los festivales españoles que pueden abrir la puerta a les nominaciones de la categoría Meyor Curtiometraxe de ficción de l'Academia de Cine y el certamen avilesín, con más de dos décades de trabayu, con cada vez más públicu, participantes y cineastes, fueron ganando esa amrca de calidá nuna cita nel calendariu del curtiometraxe que cada vez tien más repercusión. Yá dende 2016, el festival avilesín cuenta col Certificáu AIC de Calidá pa Festivales de Curtiometraxe.

Xunto a la Seición Oficial, na Seición Mediuambiental compiten 4 trabayos y na Seición Asturies otros 10. Amás, como yá ye normal nel certamen de curtiometraxes, Avilés Acción va poner cinco llargometraxes mui interesantes.

El diseñu del cartel corre a cargu del artista gallegu Lago Martínez Serantes, que ye quien s'inspiró n'elementos identitarios de la ciudá d'Avilés como lo son la so ría y la escultura del mesmu nome del artista Benjamín Menéndez pa crear la imaxen. Con esti cartel, Martínez Serantes apela, tamién a la función educadora y tresformadora que tien el cine pa la ciudá y la so ciudadanía.

En palabres del mesmu artista: "El diseñu xurde de la idea de crear el cartel d'una película que tien como protagonistes de la so trama la Ría d'Avilés y la escultura que se llama tamién asina, de Benjamín Menéndez. La escultura cambia frañendo les sos llinies rectes pa da-y una visión más orgánica. Nes sos rames furruñoses salen flores que simbolicen la creación d eles películes que se presenten al concursu. La función tresformadora del cine convierte un paisaxe conocíu nun llenzu nuevu nel qu'escribir encima'l guion de la 21 edición d'Avilés Aición".  

Seición Oficial

Hai un total de diez proyeutos cinematográficos que se van poner na Casa la Cultura d'Avilés el llunes 10 y el vienres 14 d'ochobre a les 18:15 hores van competir na Seición Oficial. "Asina vendrá la nueche" d'Ángel Santos, sobre los problemes que va arrastrando una pareya pola so rellación a distancia ente Galicia y Canadá. "L'amor amenazáu", d'Héctor Herce, intenta insistir tamién nes rellaciones amoroses, nun tríu cruzáu ente dos compañeros y una amiga que ta a puntu de volver de les vacaciones.

"Fuxendo", Álex Sardá trae la historia de abandono que sufre su protagonista Lluís tras tener una fuerte discusión en el trabajo. Eloy Domínguez Serén compite con

Álex Sardá trae la historia d'abandonu que sufre la so protagonista Lluís dempués d'una discusión mui fuerte nel trabayu. Eloy Domínguez Serén compite con "Rompente" sobre la historia d'amor d'una pareya moza que tien que facer frente a la responsabilidá de cuidar de la so criatura recién nacida. "17 minutos con Nora", d'Imanol Ruíz de Lara, trata l'acosu d'unos alumnos a una compañera de clase como filu conductor de tolo que necesita la protagonista que'l padre la acepte.

'Au Pair', de David Pérez Sañudo, sigue'l viaxe que fai una parisina al corazón d'España a onde llega como au pair y onde se va atopar con anfitirones un poco raros. El realizador vascu Mikel Rueda llega a la Seición Oficial con "Etxean", onde trata'l problema de miles de persones que por culpa'l confinamientu na crisis de la Covid 19 tuvieron que convivir obligatoriamente con quien nun queríen.

Juan Manuel Montilla, más conocíu como "El Langui" llega con "Intentando", obra na que se centra nun padre con parálisis cerebral y la rellación que tien col fíu. "Trazos del alma", de Rafael García del Castillo Arroyo, ye un retratu íntimu de la vida del so protagonista Maria José Arroyo, y con "Loop" de Pablo Polledri, complétase la programación de la Seición Oficial.

Seición Mediuambiente

Pela so parte, l'apuesta dafechu d'Avilés Aición pol poder que tien el cine pa concienciar y cambiar con ciencies sobre temes tan importantes como puede ser el cambiu climáticu, vuelve a traducise na celebración de la Seición Medioambiente, onde van competir cuatro cortos, dos ficciones y dos documentales. Podrán vese'l martes 11 d'ochobre dende les 20:15 hores na Casa la Cultura d'Avilés. Nel drama "Cuerdes", Estíbaliz Urresola Solaguren avera al espectador o a la espectadora al discutiniu d'un grupu de vieyes que se planteguen si tienen de dicir sí o non al sofitu que-yos quier dar una empresa mui contaminante pa mantener viva la so coral.

'Yá nun muerren por amor', curtiometraxe d'animación d'Inés Campello Gómez, trata sobre los caballinos de mar y la so capacidá de midir la calidá del agua dende muncho enantes de que los humanos la contaminaran.

Les dos propuestes documentales d'esta seición son "Memoria", de Nerea Barros,  sobre la desapaición de la Mar d'Aral, y "Bee Or Not to Be0", de Joan Bover y Pau Enric Serra, que recueye la voz de científicos nomaos por culpa de l'amenaza de que pueda desapaecer una de les especies polinizadores más importantes del ecosistema, les abeyes.

Seición Asturies

Finalmente, la Sección Asturies, que reconoz el llabor de la cinematografía del Principáu, tien un total de diez curtiometraxes, que se van poner el miércoles 12 y el xueves 13 d'ochobre dende les 20:15 hores, tamién na Casa la Cultura d'Avilés. "Asfixa", d'Asur Fuente, trae cine y poesía de la mano nesta pieza esperimental interpeladora, política dura y d'estética crepuscular que nos fai un brinde a la reflexón cinematográfica dende los poemes de Carlos Barral.

En 'El despidu', Mónica Fernández Menéndez ye quien a contar per aciu d'una comedia ún de los drames más d'anguaño, el paru na mocedá, completando la tetraloxía compuesta poles obres anteriores "La entrevista", "La vacante" y "El dress code", onde Rocío ye la mesma protagonista. 

En 'L'últimu vals', Sergio Garai recueye la vida tranquila que lleva un rockeru y llocutor veteranu d'un programa musical de radio que se ve alterada al recibir la visita de la fía d'un amigu que ta mui malu.  

'Fita', de Diego Flórez, cuenta como va andando pel monte de Polio un home que busca a la so perra. Carlos Navarro trabaya xunto al fotógrafu Iván Martínez en La escuridá y tráennos un homenaxe al Chris Marker de La Jetée.

Aymeca ye una animación simpática y curtia de Sergio Kozlov Stepniakov onde hai un guxán al que-y cuesta muncho travesar un sitiu. David Pérez Sañudo repite presencia n'Avilés con Vatios, onde una cilcista s'aprovecha de les prohibiciones causaes pola crisis de la Covid 19 pa refugar los contrales antidopaxe.

A lo cabero, tres documentales tres documentales completen la programación asturiana. Son Guanabacoa: tierra d'agües, de Juan Caunedo Domínguez, un viaxe musical de la mano de los nativos y natives d'esta zona de La Habana. Manual de la siega, de Samuel Fernandi, proyeutu ganador del premiu  FICX Pro Lab 2020 nel Festival Internacional de Cine de Gijón/Xixón, col que'l realizador asturianu nos avera l'actividá entexeneracional de segar la pación n'Asturies. Y, pa terminar, Vas ser la mio memoria siempre, una película qu'avera la historia íntima y la social, firmada pola cineasta Marina Munárriz.

El xuráu d'Avilés Aición 2022 tará formáu pol cineasta local Amar Hernández, la direutora del Centru Integráu de Formación Profesional de Comunicación, Imaxen y Sonidu (CISLAN) de Llangréu, María Isabel Lugilde Rodríguez, y la direutora de la Cátedra de Cine d'Avilés-Universidá d'Uviéu, Diana Díaz.

Llargometraxes

Amás, como yá ye normal nel certamen de curtiometraxes, Avilés Aición va poner cinco llagometraxes. Les películes escoyíes son les priemres películes d'Amalia Ulman, El Planeta, cuenta coses que-yos pasaron de verdá a una madre y una fía xixoneses que se dedicaron a estafar al comerciu llocal. 

La obra de Francisco Rovira Beleta, Los Tarantos, sobre la historia d'amor imposible ente dos xitanos d'etnies diferentes.

Xabaces, documental d'Álex Galán sobre l'autogobiernu que pretenden un grupu de ganaderos.

L'aclamada por crítica y públicu The Assistant, de la cineasta estadounidense Kitty Green, sobre l'abusu llaboral que sufre una aspirante a productora cinematográfica nel  so primer trabayu en graduándose.

Y ún de los trabayos más recientes del cineasta francés Louis Garrel, la comedia Un pequeñu plan… cómo salvar el planeta sobre'l comportamientu erráticu d'un adolescente qu'entasma a robar pa poder financiar un proyeutu ecolóxicu, al que-y dieron el premiu Lurra de Greenpeace nel pasáu Zinemaldia.

Más información na páxina web d'Avilés Aición Film Festival www.avilesaccion.com

Materiales: https://bit.ly/MaterialesPrensaAvilesAicion2022