Contacto

Los trabayos entamaron n'avientu. L'alcaldesa d'Avilés, Mariví Monteserín y el conceyal de Diseñu Urbanu, Pelayo García, visitaron el monumentu de Los Canapés al terminar les obres.

Hai de señalar que lo último de too foi aplicar un tratamientu  al monumentu pa que l'agua nun cale, con un productu basáu na nanoteunoloxía.

Tamién s'arregló'l sitiu onde tán, poniendo baldoses ente los dos canapés, púnxose lluz y hai previsto poner bancos.

La empresa Cabero Edificaciones SA encargóse de too esto, con un contratu  que costó 306.841 euros cofinanciaos nun 80% pol Fondu Européu de Desarrollu Rexonal (FEDER), al tratase d'una actuación que ta dientro  la Estratexa de Desarrollu Urbanu Sostenible Integráu (EDUSI) d'Avilés.

Primero llimpióse la piedra del monumentu y les sos xuntes. Pa esti llabor usáronse productos biocides y tamién se fizo una llimpieza por microproyeición d'áridos de silicatu d'aluminiu.

Tamién se quitaron materiales apegaos y raros que taben nel monumentu y nun yeren de la piedra orixinal, como'l morteru de cementu usáu en dalgunes aprtes. Dempués, restauráronse los volúmenes con inxertos y otros trabayos pa llantar le fechura, usando la téunica “kintsukuroi", que consiste ene reparar lo que ta estropiao ensin tapar les cicatrices. 

Pa dexar curiosu'l sitiu onde tán, púnxose un suelu nuevu. Y pa terminar llevantóse una muria nueva de piedra y lluces tamién nueves, too ello pa poder facer que'l monumentu destaque nel sitiu nel que ta. Los trabayos tuvieron tol tiempu un siguimientu arqueolóxicu. 

Los Canapés

Los Canapés son dos bancos construyíos en 1786 con piedra de la cantera de Bustiello pol arquiteutu y escultor asturianu José Bernardo de la Meana Costales.

De las 14 llinies d'actuación que componen la EDUSI d'Avilés cofinanciada con Fondos FEDER, la númberu 9 ta dedicada específicamente a "Aiciones de rexeneración urbana p'afitar el patrimoniu históricu-cultural d'Avilés". Ye nesta llinia d'actuación onde s'enmarca la recuperación del monumentu de Los Canapés.

El proyeutu arrancó nel mes de mayu de 2020 faciendo un estudiu de la piedra enantes, fechu pola empresa GEA Asesoría Xeolóxica, por un importe de 4.235 €. Primero tomáronse datos y analizóse l'estáu del monumentu, pa poder guiar les actuaciones de dempués en materia de conservación. 

Con esti informe como base diose esti pasu: la redaición del proyeutu de restauración. El contratu pa facelo foi  p'Álvarez Arango Arquitectos SLP, por un importe de 11.825 €. El proyeutu resultante mandóse a la Direición Xeneral de Cultura y Patrimoniu, organismu que dio'l so "visto bueno" al proyeutu el pasáu mes de setiembre.