Contacto

N'Avilés celébrase otru añu más la Esposición Nacional Flores d'Hortensies y Paisaxismu, na so quinta edición, xuntando cultivadores, espertos y espertes y floristeríes de toa Asturies, na Antigua Pescadería, esti sábadu y domingu, 4 y 5 de xunu.

Organizada pola Asociación Castrillón Para Todos - Amigos del Camino de Santiago, en collaboración col Conceyu d'Avilés, l'actu d'inauguración oficial sedrá pasáu mañana, sábadu 4, a les 13.00 hores y va presidilu Yolanda Alonso, conceyala de Cultura y Promoción de Ciudá d'Avilés.

A les 13.30 hores, Eduardo Cires Rodríguez, Profesor Titular del Departamentu de Bioloxía d'Organismos y Sistemes de la Universidá d'Uviéu, y Curator del Herbario FCO, sedrá l'encargáu de presentar la esposición, y de ser el pregoneru d'ella.

N'amuesa podrán almirase los exemplares aportaos por floristeríes d'Avilés y d'Uviéu, asina como por viveros d'Avilés y Castrillón, y Asociaciones y particulares de L.luarca, Somao, Pravia, Muros de Nalón, San Esteban de Pravia, Ranón, Gijón/Xixón y Castrillón. Tamién participen los Xardines de Fonte Baixa (L.luarca) y Margarita (San Esteban de Pravia), y la Tienda del Xardín Botánicu de Xixón, ente otros.

Nel programa inclúyense dos conferencies, en La Serrana, Hotel 40 Nudos. Son les que vienen darréu:

• Sábadu 4, 18.00 hores. "El Mundo de las Hortensias: Hortensias Clásicas y Modernas". Por Marián Parra Castaño, bióloga y botánica de la Tienda del Xardín Botánicu de Xixón.

• Sábadu 4, 18.45 hores. "Hortensias. Flor del siglo XXI". Por Gonzalo González Landa, coleccionista d'hortensies, ciruxanu y escritor.

Tamién les pequeñes y pequeños de la casa tendrán un espaciu  propiu, el mesmu sábadu, dende que s'abra la esposición, con un taller infantil de dibuxos.

Los comercios y establecimientos d'hostelería d'Avilés van ponese curiosos pa la ocasión, cola collaboración de la UCAYC. Tamién inviten a toles persones pa que s'averen a la esposición, y conocer la rellación de la Contorna d'Avilés y el Camín de Santiago, ta  nel ADN de los y les organizadores. Hai de disfrutar de la historia, la cultura,  el patrimoniu y la gastronomía, andando pelos  pueblos y ciudaes que tán nel Camín de Santiago de les Hortensies, Hortensies nel Camín - Hydrangea in St.James´Way.

L'horariu de visita, too de baldre, sedrá'l sábadu 4, dende la inauguración a les 13.00 hores, hasta les 21.00 hores. Y el domingu 5, de 11.00 a 20.00 hores.

Programa

Sábadu 4

• 13.00 hores. Antigua Pescadería. Inauguración Oficial
• 13.30 hores. Antigua Pescadería. Presentación d'Eduardo Cires Rodríguez
• 18.00 hores. La Serrana, Hotel 40 Nudos. Conferencia "Hortensias Clásicas y Modernas", por Marián Parra Castaño.
• 18.45 hores. La Serrana, Hotel 40 Nudos. Conferencia "Hortensias. Flor del siglo XXI", por Gonzalo González Landa
• 21.00 hores. Pieslle del sitiu.

Domingu 4

• 11.00 hores. Ábrese la esposición
• 19.00 hores. Entrega de diplomes y regalos pa espositores y participantes
• 20.00 hores. Pieslle