![](/documents/20124/564223/REN%C3%89.+Cementerio_Carriona.jpg/e9dd96f1-e2b8-ab58-b297-2905ab90d100?t=1624381579329)
cicLaC
Cementeriu Municipal de la Carriona y el so Centru d'Interpretación cicLaC
El cementeriu Municipal de La Carriona ye un espaciu creáu a lo cabero del sieglu XIX como zona funeraria a les afueres d'Avilés, Asturies. El so arquiteutu foi Ricardo Marcos Bausá. Tien muncha importancia histórica-artística y por eso ta dientro l'ASCE (Association of Significant Cemeteries in Europe), amás de ser cabezalera del proyeutu EUCEMET, coles sigles n'inglés que signifiquen "Cementerios europeos: xardinos d'almes, diversidá y patrimoniu", que tien como oxetivu da-y importancia a los cementerios cola so musealización.
Ellí apegáu al cementeriu hai un espaciu espositivu cicLaC, el primeru n'España que xunto col Muséu de la Historia Urbana d'Avilés , conformaben la rede de museos municipales de la ciudá. Nel percorríu que se fai pel cicLaC quien lu visite va atopase con una riestra paneles qu'amuesen el contestu históricu nel que se llevanta'l cementeriu, la so fechura a lo cabero'l sieglu XIX, los principales elementos artísticos con obres d'artistes con renome como Cipriano Folgueras, Manuel del Busto o Federico Ureña, los avilesinos más significativos enterraos ellí como Armando Palacio Valdés, Julian García San Miguel, Benjamín y Julián Orbón, Marcos del Torniello..., asina como una mención a los cemeterios antiguos de la ciudá y a los otros dos cementerios del Conceyu: el parroquial de San Cristoba/San Cristóbal de Entreviñas y el de Valliniello/Navarro, enseñando tamién l'Avilés d'aquel tiempu.
El cuerpu espositivu complétenlu varies vitrines con reproducciones facsimilares de proyeutos de panteones, solicitúes d'enterramientos de mediaos del sieglu XIX o proyeutos de costrucciones que nun se llegaron a facer que taben nel archivu del Conceyu d'Avilés, asina como dos audiovisuales, ún de la Ruta Europea de Cementerios y otru del mesmu cementeriu avilesín.
Quien vaya a visitalu tien un planu col que puede siguir los itinerarios "Espaciu d'arte" y "Llugar de memoria" colos que percorrer esti cementeriu preciosu, descubriendo'l valor artísticu del mayor muséu al aire que tien Avilés.
Visites Guiaes al Cementeriu La Carriona.
Entrada de baldre
Llunes a vienres: 10:00 a 13:00h / 16:00 a 18:00h
Sábados, domingos y festivos: 11:00 a 13:00h
Teléfonu: 985 541 939
Corréu Electrónicu: museodeaviles@aviles.es
Facebook del Centru d'Interpretación del Cementeriu Municipal de la Carriona
![](https://aviles.es/documents/portlet_file_entry/20124/Fecha+en+que+se+comparti%C3%B3+el+reel_+ago+24%2C+2022_qr+%281%29.png/68ee49e0-3cdc-dc24-2b19-d3f6e312c07b)
cicLaC Centru d'Interpretación del Cementeriu La Carriona
Cai La Carriona, 7
33401 Avilés. Asturies
-
Fiestas y Festejos
-
Igualdad
-
Fiestas y Festejos
-
Fiestas y Festejos