Contacto

La ventiún edición d'Avilés Aición Film Festival, que va ser del 8 al 15 d'ochobre, fai un homenaxe a la diseñadora de vestuariu asturiana Maite Capín. Esti premiu pretende poner el focu na polifacética carrera de la diseñadora que fizo trabayos d'alta costura, al empar del desenvolvimientu de la so carrera en televisión y cine.  

Precisamente foi la industria cinematográfica la que reconoció'l so llabor cola candidatura a los Premios Goya 2019 de l'Academia de les Artes y les Ciencies Cinemtográfiques d'España na categoría de Meyor diseñu de vestuariu pola película El Crucigrama de Jacob (Ana López Martín, 2018).

Nel ámbitu de la televisión, el so llabor conozse por proyectos bien nomaos como la internacionalmente aclamada Xuegu de tronos y la recientemente estrenada La casa del dragón, amás d'haber trabayao nuna montonera producciones de plataformes como Disney, HBO, Netflix y Amazon.

Avilés Aición pretende con esti premiu dar a conocer  los oficios que nun son tan conocíos nel mundu audiovisual y que, ensin embargo, resulten fundamentales pa llevar a cabu cualquier producción, como ye'l diseñu de vestuariu, trabayáu sobre too por muyeres. Con esti premiu, el certamen tamién pon l'acentu nel talentu asturianu dientro de la cinematografía nacional y internacional. 

Maite Capín recibirá'l Premiu Homenaxe na gala de pieslle del Festival, que va ser el sábadu 15 d'ochobre dende les 20:15 hores nel Teatru Palacio Valdés d'Avilés.

Avilés Aición Film Festival vuelve a batir, un añu más, el récord de participación, con 748 obras apuntaes. Hasta esti momentu nun avance de la programación hai un total de 24 curtiometraxes finalistes que van competir na Seición Oficial, Seición Asturies y Seición Mediuambiente.

Avilés Aición ta organizáu pola Conceyalía de Cultura del Conceyu d'Avilés y cuenta col sofitu d'Asturiana de Zinc (Glencore) y la collaboración del Conseyu de la Mocedá d'Asturies, Puertu d'Avilés, Unión de Comerciantes d'Avilés y Comarca (UCAYC) y la Radiotelevisión del Principáu d'Asturies (RTPA).

El certamen va repartir 6.000 euros en premios y, ye la primer vez, Avilés Aición va ser un Festival calificador pa los Premios Goya 2023, un aliciente más pa los y les trabayadores que compiten na Seición Oficial. Sólo son 41 los festivales españoles con capacidá p'abrir la puerta a les nominaciones de la categoría Meyor Curtiometraxe de Ficción d l'Academia del Cine y el certamen avilesinu, con más de dos décades de trabayu, con más públicu cada vez, más participantes y cineastes, fueron ganando esa marca de calidá nuna cita nel calendariu del curtiometraxe que cada vez tien más repercusión. Yá dende 2016 el festival avilesín cuenta col Certificáu AIC de Calidá pa Festivales de Curtiometraxe.